Sürücülərin bu səhvi piyadavurma hallarını artırır- Mütəxəssisdən XƏBƏRDARLIQ - VİDEO

Tunellərdən çıxış zamanı sürətin artırılması yol-nəqliyyat hadisələri riskini ciddi şəkildə yüksəldir. Xüsusilə tuneldən dərhal sonra bəzi sürücülərin sürəti həddindən artıq artırması piyadalar üçün real təhlükə yaradır.

Avtosfer.az xəbər verir ki, qəza əleyhinə kursların məşqçisi Aqil Rəhimov bu barədə sürücülərə xəbərdarlıq edib. Onun sözlərinə görə, tunellərin çıxış hissələrində piyadaların qəfil və nəzarətsiz şəkildə yolu keçməsi halları tez-tez müşahidə olunur:

Qəbələ yolunda turistlər qəzaya düşdü: Maşından düşüb şəkil çəkdirdilər - VİDEO

“Tuneldən çıxan kimi bəzi sürücülər sürəti həddindən çox artırırlar. Amma dərhal sonra elə hallar olur ki, insanlar yolu çox təhlükəli şəkildə qaçaraq keçirlər. Onlar nə ətrafa baxırlar, nə də öz təhlükəsizliklərini düşünürlər. Təəssüf ki, belə vəziyyətlərdə sürücü istəmədən qəza törədə, özü də ciddi təhlükə ilə üzləşə bilər”.

Aqil Rəhimov qeyd edib ki, piyadaların məsuliyyətsiz davranışı sürücülər üçün əlavə risk yaradır, lakin bu, sürücüləri ehtiyatlı olmaq məsuliyyətindən azad etmir:
“Bəzi piyadalar özlərini qorumurlar, amma sürücü hər zaman özünü və avtomobildə olanları qorumalıdır. Belə yerlərdə ani manevrlər etmək, dəmir məhəccərlərə və ya digər maneələrə çırpılmaq riski çox yüksəkdir”.

Məşqçi sürücülərə tövsiyə edib ki, tunellərdən çıxarkən sürəti artırmasınlar, ətraf mühiti diqqətlə müşahidə etsinlər və gözlənilməz piyada hərəkətlərinə hazır olsunlar. Onun sözlərinə görə, bu sadə ehtiyat tədbiri bir çox ağır yol-nəqliyyat hadisəsinin qarşısını ala bilər.

Eltac Zülfüqaroğlu