Sürücülərin gözdən qaçırdığı təhlükə ağır qəzaya səbəb ola bilər – XƏBƏRDARLIQ - VİDEO

Bir anlıq səhv qərar günahsız sürücünün qəzaya düşməsinə səbəb ola bilər. Mütəxəssis sürücüləri hərəkət zamanı yalnız qarşıdakı yolu deyil, ətrafdakı bütün mümkün riskləri də əvvəlcədən qiymətləndirməyə çağırır.

Bir çox sürücü hər gün avtomobil idarə etsə də, yol hərəkəti zamanı ətrafda yaranan gizli təhlükələri vaxtında qiymətləndirə bilmir. Nəticədə isə başqa bir sürücünün qəfil reaksiyası zəncirvari yol-nəqliyyat hadisəsinə səbəb ola bilir.

Avtosfer.az xəbər verir ki, bu barədə qəza əleyhinə kursların məşqçisi Aqil Rəhimov danışıb.

Onun sözlərinə görə, bəzi təhlükələr ilk baxışdan görünməsə də, onları əvvəlcədən təhlil etmək mümkündür.

"Videoda ilk baxışdan hər hansı təhlükə nəzərə çarpmır. Lakin diqqətlə baxdıqda yolun sol zolağında yüksək sürətlə hərəkət edən avtomobil və sağ tərəfdə məhəllədən əsas yola çıxmağa hazırlaşan nəqliyyat vasitəsi görünür. Əgər həmin avtomobil qəfil hərəkət etsəydi, soldakı sürücünün əyləc tətbiq etməyə vaxtı çatmaya bilərdi. Belə vəziyyətdə o, instinktiv olaraq sükanı sağa çevirəcək və sağ zolaqda hərəkət edən avtomobillə toqquşma riski yaranacaqdı", – deyə Aqil Rəhimov bildirib.

Məşqçi qeyd edib ki, bu cür vəziyyətlər "instinktiv manevr" adlanır. Sürücü təhlükədən yayınmaq üçün ani qərarla sükanı başqa istiqamətə çevirir. Lakin bu manevr çox vaxt daha ağır nəticələrə səbəb olur və qəza təhlükəsini artırır.

Belə risklərin qarşısını almaq üçün sürücülər yalnız öz hərəkətlərini deyil, digər hərəkət iştirakçılarının mümkün səhvlərini də əvvəlcədən nəzərə almalıdırlar. Xüsusilə məhəllə çıxışlarında, yolayrıcılarında və görünmə məhdud olan ərazilərdə sürəti azaltmaq, təhlükəsiz ara məsafəsini saxlamaq və əyləcə hazır olmaq vacibdir.

Aqil Rəhimov vurğulayıb ki, peşəkar sürücülük yalnız qaydaları bilməkdən ibarət deyil. Ən vacib bacarıqlardan biri təhlükəni bir neçə saniyə öncədən görmək və hadisələrin mümkün inkişafını əvvəlcədən analiz etməkdir. Bu yanaşma bir çox yol-nəqliyyat hadisəsinin qarşısını almağa imkan verir.

Eltac Züflüqaroğlu