Ard-arda təhlükəli ötmə edən sürücü az qala qəzaya səbəb olacaqdı - VİDEO

Pirşağı yolunda yol hərəkəti qaydalarını kobud şəkildə pozan sürücü kameraya düşüb.

Avtosfer.az-ın məlumatına görə, hadisə iyulun 26-da saat 16:17 radələrində qeydə alınıb.

Kadrlardan görünür ki, sıxlıqda dayanmaq istəməyən 99-UO-277 dövlət nömrə nişanlı “Hyundai” markalı avtomobilin sürücüsü təhlükəli ötmə əməliyyatı həyata keçirib. Belə ki, sürücü qarşısında hərəkət edən avtomobili ötmək məqsədilə əks hərəkət zolağına çıxıb. Bu zaman qarşı istiqamətdən avtomobilin yaxınlaşdığını görərək tələsik şəkildə yenidən öz hərəkət zolağına qayıdıb və görüntünü qeydə alan nəqliyyat vasitəsi üçün qəza şəraiti yaradıb.

Lakin sürücü bununla da kifayətlənməyib. O, qısa müddət sonra yenidən əks hərəkət zolağına çıxaraq təhlükəli ötmə manevri edib və eyni vəziyyətin təkrarlanmasına səbəb olub. Görüntülərdə sürücünün qarşıdan gələn nəqliyyat vasitəsini görməsinə baxmayaraq, ötmə əməliyyatını davam etdirməsi və son anda qarşısındakı avtomobilin önünə keçərək zolağa qayıtması aydın şəkildə əks olunub.

Sürücünün bu cür məsuliyyətsiz davranışı həm özünün, həm də digər hərəkət iştirakçılarının həyatını ciddi təhlükə altına qoyub.

Nərmin