Avtobus nişanı olmayan yerdə sürücüyə cərimə yazıldı - İDDİA - VİDEO

Bakıda haqsız yerə cərimələndiyini iddia edən sürücü redaksiyamızın qaynar xəttinə şikayət ünvanlayıb. Avtosfer.az xəbər verir ki, cərimə aprelin 27-də, paytaxtın Gəncə prospektində tətbiq edilib. Sürücü bildirir ki, idarə etdiyi 99-BS-284 qeydiyyat nişanlı "Nissan" markalı avtomobillə Xudu Məmmədov küçəsindən sağa — Gəncə prospektinə dönüb və  avtobus zolağını qırıq-qırıq xətdə tərk edib. Lakin ona cərimə yazılıb. 
Qərara əlavə edilmiş videodan da aydın şəkildə görünür ki, avtobus zolağının sərhədini bildirən bütöv xətt silindiyi üçün əvvəlki qırıq xəttlər üzə çıxıb. Sürücü də bunu üstün tutaraq imkan yarandığı zaman qırıq xətdə zolağı tərk edib.
O, bir neçə gün sonra həmin əraziyə gedib çəkiliş aparan zaman məlum olub ki, nişanlanma xəttini yeniləyiblər. Sözügedən küçədən sağa dönən yerdə isə ümumiyyətlə avtobus zolağını bildirən 5.9 nişanının olmadığını üzə çıxarıb.
Sürücü yazılmış cərimənin haqsız olduğunu bildirir və bu səbəbdən həmin qərarın ləğv edilməsini xahiş edir.

Fərid