Bakıda ticarət köşklərinin sahibləri soyuducuları ağaclara bağlayır – ŞİKAYƏT - FOTO

Uzun müddətdir həm Bakıda, həm də digər bölgələrdə kioskların fəaliyyəti ilə bağlı sakinlər arasında narazılıq artmaqdadır. Belə ki, vətəndaşlar “qəzet köşkü” adı altında fəaliyyət göstərən kioskların artıq onlar üçün nəzərdə tutulan fəaliyyət zonalarını genişləndirmələrindən şikayət edir. Kioskların ən çox şikayət edilən tərəfi isə onların səkiyə soyuducular düzüb su, dondurma və s. satmasıdır.

Avtosfer.az xəbər verir ki, yaranmış mənzərə ilə bağlı Sumqayıt şəhərində bir neçə dəfə reydlər keçirilsə də, analoji reydlərin Bakıda keçirilməsi hələ də görülməyib. Bu səbəbdən Bakıda qeyd edilən ticarət obyektlərinin fəaliyyəti bir növ nəzarətsiz qalıb.

Vətəndaşların narazılıqları bir tərəfə, kiosk sahibləri bütün şikayətlərə rəğmən hətta soyuducuları Bakının küləyindən qorumaq üçün onları ağaca bağlamaqdan da çəkinmirlər. Nəinki səkini zəbt edirlər, hətta vətəndaşın yoluna da sədd çəkməyi belə gözə alırlar. Yasamal rayonu Landau küçəsində (Hüseyn Cavid parkının yanı) quraşdırılan köşk də küləkdən soyuducuları qorumaq üçün eyni üsula əl atıb.

Şəhər sakinləri aidiyyəti qurumları ticarət köşklərinin fəaliyyətini nəzarətdə saxlamağı və səkiləri piyadalar üçün qorumağı tələb edirlər.

Səfər