COP29 zolaqlarından istifadə edərək qəza şəraiti yaradanlar hələ də var - RƏSMİ AÇIQLAMA

Paytaxt ərazisində ictimai nəqliyyatın fasiləsiz hərəkətini təmin etmək məqsədilə xüsusi zolaqlar təşkil edilib. Bununla yanaşı ölkəmizdə keçirilən COP29 beynəlxalq konfransının iştirakçılarını daşıyan nəqliyyat vasitələrinin təhlükəsiz şəraitdə mənzil başına çatmaları üçün üzərinə COP29 loqosu qeyd olunan zolaqlar müəyyələşib.

Avtosfer.az xəbər verir ki, bu zolaqlardan avtomobil idarə etmək digər nəqliyyat vasitələrinə qadağan edilsə də, yenə də bəzi sürücülərin zolaqda tıxaclara səbəb olması kimi faktlarla rastlaşmaq mümkündür.

Məsələ ilə əlaqədar, Bakı Şəhər Dövlət Yol Polisi İdarəsinin bölmə rəisi, polis kapitanı Toğrul Nəsirli saytımıza açıqlamasında bildirdi ki, ümumi istifadədə olan nəqliyyat vasitələrinin fasiləsiz hərəkətini təmin etmək məqsədilə nəzarət-profilaktik tədbirlər  həyata keçirilir:

“Qanunvericiliyin tələblərinə əsasən, “Yol Hərəkəti Haqqlnda” qanunun 48-ci maddəsinə uyğun olaraq, əgər zolağın müəyyən hissəsi qırıq-qırıq xətlərlə ayrılmışdırsa, sürücülər həmin hissədən zolağa girə, sürücülər dönmə edərkən, yaxud da sərnişin mindirib-düşürərkən bu zolağa daxil ola bilərlər və bu hərəkətlər ümumilikdə həmin zolaqda hərəkət edən nəqliyyat vasitələrinin hərəkətinə maneə yaratmamalıdır. Bəzən digər nəqliyyat avsitələri həmin zolağa anidən manevr edərək qəza şəraiti də yaradırlar. Belə hallar aşkarlandıqda, ərazidə xidmət aparan yol-patrul əməkdaşları, eləcə də, xüsusi texniki vasitə ilə dəqiqləşdirildikdə, həmin sürücü barəsində Azərbaycan Respublikası İnzibati Xətalar Məcəlləsinin 327.1-1-ci maddəsinə əsasən 2 cərimə balı və 100 manat məbləğində cərimə nəzərdə tutulub”.

Bölmə rəisi sonda onu da qeyd edib ki, bu cür tədbirlərin görülməsində məqsəd sürücülərə cərimə tətbiq etmək deyil, zolaqda hərəkəti nəzərdə tutulan nəqliyyat vasitələrinin rahat və təhlükəsiz hərəkətini təmin etməkdir. Sürücülərdən xahiş olunur ki, zolaqlardan istifadə etməsinlər, əks halda qanunamüvafiq addımlar atılacaq.

Səfər