Əhalinin ən sıx yaşadığı küçələrin səkilərini belə zəbt edirlər - FOTO

Paytaxt küçələrində piyadaların hərəkətinə mane olan mənzərələr gündəlik hal alıb.

Avtosfer.az xəbər verir ki, ən çox şikayət edilən məsələlərdən biri sürücülərin avtomobillərini səkilərdə saxlamasıdır. Bu isə həm piyadaların rahat hərəkətinə, həm də ümumi təhlükəsizliyə ciddi problemlər yaradır.

Sakinlərin sosial şəbəkədə paylaşdığı fotolardan da görünür ki, bir sıra avtomobillər səkidə parklandığı üçün piyadalar yolun nəqliyyat vasitələrinin hərəkəti üçün nəzərdə tutulan hissəsi ilə irəliləməyə məcbur qalırlar.

Belə ki, Nərimanov rayonu Xaqn Şuşinski küçəsində 77-AC-799 və 50-EJ-825 nömrə nişanlı “BMW” markalı avtomobillər, Yusif Vəzir Çəmənzəminli küçəsində isə 90-XA-271 nömrə nişanlı “Mercedes” markalı və 77-DV-900 nömrəli “Ford” markalı avtomobillər səkiyə dırmaşdırılıb.

Eyni vəziyyət İnşaatçılar prospektində də yaşanıb. 77-QS-570, dövlət nömrə nişanlı müvafiq olaraq “Mercedes” markalı avtomobillər hər gün bu ərazidə park edilir və sakinlərə çətinlik yaradır.

Ekspertlər bildirirlər ki, əgər şəhərin istənilən küçəsində, hətta obyektlərin qapısına qədər avtomobil sürməyə şərait yaradılarsa, insanların şəxsi maşından imtina edib ictimai nəqliyyata üstünlük verməsi mümkün olmayacaq. Bu səbəbdən əvvəlcə dağıdılaraq parkinq meydançasına çevrilmiş səkilərin bərpa edilməsi, sonra isə vətəndaşların avtobusdan istifadəyə və piyada gəzməyə təşviq olunması vacib hesab edilir.

Eltac Zülfüqaroğlu