Piyadalar üçün nəzərdə tutulan cərimələr azdır – Aqil Rəhimov - VİDEO

Yol hərəkəti təhlükəsizliyi ilə bağlı maarifləndirmə tədbirlərinin artmasına baxmayaraq, piyadaların qaydalara əməl etməməsi hələ də ciddi problem olaraq qalır.

Avtosfer.az xəbər verir ki, qəza əleyhinə kursların məşqçisi Aqil Rəhimov “AvtoFm”də çıxışı zamanı bildirib ki, Azərbaycanda bəzən qeyri-adi mənzərə yaranır. Sürücü piyadadan ehtiyat edir, lakin piyada sürücüdən çəkinmir.

Onun sözlərinə görə, bəzi piyadalar yolun hərəkət hissəsini keçərkən nə piyada keçidindən istifadə edir, nə də təhlükəsizlik qaydalarına diqqət yetirirlər:

“Piyada keçidindən istifadə etməmək bir yana, telefonla danışa-danışa yolu keçir, avtomobilə tərəf baxmır. Bu isə həm öz həyatı, həm də sürücülər üçün ciddi risk yaradır”, – deyə Aqil Rəhimov qeyd edib.

Məşqçi vurğulayıb ki, müxtəlif televiziya və radio kanallarında, o cümlədən maarifləndirici proqramlarda yol təhlükəsizliyi ilə bağlı geniş izahatlar verilsə də bəzi piyadalar hələ də məsuliyyətsiz davranırlar. Onun fikrincə, inzibati cərimələrin tətbiqi və nəzarətin gücləndirilməsi bu sahədə nizam-intizamın artırılmasına kömək edə bilər.

Ekspert hesab edir ki, yol hərəkətində təhlükəsizlik yalnız sürücülərin deyil, piyadaların da məsuliyyətli davranışından birbaşa asılıdır.

Eltac Zülfüqaroğlu