Qayda pozub hələ qarşı tərəfi səhv çıxardı: “Mənə sürməyi öyrədirsən?” - VİDEO

Paytaxtın Hava limanı yolunda qayda pozan sürücü kameraya düşüb.

Avtosfer.az-ın məlumatına görə, hadisə oktyabrın 18-də saat 08:43 radələrində qeydə alınıb.

Kadrlardan görünür ki, 90-UX-114 dövlət nömrə nişanlı “KIA” markalı avtomobilin hərəkət etdiyi zolaq bitdiyindən sol zolağa keçmək istəyib. Lakin o, həmin zolaqdakı maşına məhəl qoymadan manevr edərək görüntünü qeydə alan nəqliyyat vasitəsinin yolunu kəsib və qəza şəraiti yaradıb.

Bundan sonra təhlükə ilə üzləşən sürücü “KIA”nın sürücüsünə yaxınlaşaraq iradını bildirib. O, öz zolağı ilə hərəkət etdiyini vurğulayaraq qarşı tərəfin manevr etməzdən əvvəl dönmə işığını yandırmalı olduğunu deyib.

“KIA”nın sürücüsü isə “Nəyə görə yandırmalıyam? Zolaqdı da, hərə bir yol tapır gedir də. Mənə sürməyi öyrədirsən?” sözləri ilə cavab verib.

Xatırladaq ki, sürücülər zolaq dəyişərkən digər hərəkət iştirakçılarına yol verməli, manevrə başlamazdan əvvəl isə müvafiq dönmə işıqlarından istifadə etməlidirlər.

Nərmin