Qırmızı işıqda özünü ölümə atan piyada təhlükə yaratdı - VİDEO

Bakıda piyadanın yol hərəkəti qaydalarını pozması təhlükəli vəziyyət yaradıb. Avtosfer.az-ın məlumatına görə, hadisə iyulun 15-də paytaxtın Vaqif prospektində baş verib. Belə ki, nəqliyyat vasitələri üçün yaşıl işıq yandığı vaxtda bir piyada qəfil hərəkət hissəsinə daxil olaraq qarşı tərəfə keçməyə çalışıb. Bu zaman o, hərəkətdə olan avtomobillərin qarşısına çıxaraq həm öz həyatını riskə atıb, həm də sürücülər üçün təhlükəli vəziyyət yaradıb. Videodan da açıq şəkildə görünür ki, sol zolaqda hərəkət edən avtomobilin sürücüsü kəskin tormoz verməklə piyadanı vurmaqdan son anda yayına bilib.

Təəssüf ki, bəzi piyadalar keçidi istədikləri formada keçə biləcəklərini düşünürlər. Bu, yanlış yanaşmadır. Belə davranış, ən yaxşı halda inzibati cərimə ilə nəticələnə bilər. Daha təhlükəlisi isə avtomobilin piyadanı vurması ilə faciəyə çevrilə bilər.

Fərid