Tailandda ikimərtəbəli avtobus qəzaya uğrayıb: Xeyli yaralı var - FOTO

Tailandda ikimərtəbəli sərnişin avtobusunun qəzaya uğraması nəticəsində azı 28 nəfər xəsarət alıb.

Avtosfer.az xəbər verir ki, bu barədə "Matichon" nəşri məlumat yayıb. Bildirilib ki, nəqliyyat vasitəsi Suratthanidən Banqkoka doğru hərəkətdə olub. Yerli vaxtla təxminən saat 4:00-da Phetçaburi əyalətində baş verən hadisə ilə bağlı təcili yardım xidmətlərinə məlumat daxil olub. İçərisində 31 nəfərin olduğu avtobus ayırıcı səddə çırpılaraq aşıb. Jurnalistlərin əldə etdiyi məlumata görə, beş nəfər ağır dərəcəli bədən xəsarətləri alıb. Daha 23 sərnişində isə müxtəlif əziklər və sıyrıqlar aşkarlanıb.

Hadisə yerinə hüquq-mühafizə orqanlarının əməkdaşları və təcili tibbi yardım briqadaları cəlb edilib. Həkimlər stasionar müalicəyə ehtiyacı olan yaralıları xəstəxanalara çatdırıblar. Hazırda aidiyyəti qurumlar qəzanın başvermə səbəblərini və təfərrüatlarını araşdırır. İndiyədək xəsarət alanlar arasında xarici turistlərin olması barədə heç bir məlumat verilməyib.