Bakı–Tbilisi reysləri bərpa olundu - Tur paketlərə maraq artdı

Bakı–Tbilisi qatar reyslərinin bərpasından sonra Gürcüstana quru yolla səyahət imkanları yenidən genişlənib. Bu isə həm turistlərin, həm də turizm şirkətlərinin diqqətini çəkən mövzulardan birinə çevrilib.

Bəs hazırda turizm şirkətləri tərəfindən Bakı–Tbilisi–Bakı qatarı ilə Gürcüstana xüsusi turlar təşkil olunurmu? Ümumiyyətlə, azərbaycanlı turistlərin qatarla səyahətə marağı hansı səviyyədədir?

Avtosfer.az-ın məlumatına görə, mövzu ilə bağlı Redaktor.az-a açıqlamasında turizm eksperti Nizami Həsənov bildirdi ki, hazırda Azərbaycan və Gürcüstan arasında açılan dəmir yolu xəttinin turizmə böyük töhfəsi var:

“Turizmin inkişafında böyük rolu olan nəqliyyat vasitələrindən biri qatar nəqliyyatıdır. Yəni bu gün qatar biletlərinin qiymətləri baha olsa da, tələbat var. Artıq bir neçə şirkət Azərbaycan vətəndaşları üçün hazır tur proqramları və tur paketləri ilə satışlara başlayıb. Düzdür, qatarda yer məsələsi bir az çətindir. Yəni yaxın bir ay–bir ay yarım müddətində çox dolu olduğu üçün yer tapmaq çətindir. Amma bunun üçün, dediyim kimi, bir neçə şirkət artıq öncədən yerlərini alıb, hotellərini bron edib və qrup turları təşkil etməyə başlayıb”.