Bəzi miqrantların Rusiya vətəndaşlığı alması qadağan ediləcək

Rusiya Dövlət Duması gələn həftə məhkumluğu ödənilməmiş və ya götürülməmiş miqrantların Rusiya vətəndaşlığı və ya ölkədə yaşamaq hüququ alması imkanının istisna edilməsini təklif edən qanun layihəsinə baxacaq.

Avtosfer.az Oxu.az-a istinadən bildirir ki, bu barədə Dövlət Dumasının sədri Vyaçeslav Volodin "Max" kanalında məlumat verib.

Üstəlik, bu məhdudiyyət Rusiya ərazisində və ya onun hüdudlarından kənarda törədilmiş istənilən cinayətə görə yaranan məhkumluqlara şamil ediləcək.

O qeyd edib ki, bundan əlavə, belə bir fakt aşkarlandıqda, əvvəllər verilmiş yaşayış icazələri və ya müvəqqəti yaşayış icazələri ləğv olunacaq. Dövlət Dumasının sədri aydınlıq gətirib ki, bu qərar Rusiya ərazisində qaçqın kimi tanınan, yaxud siyasi və ya müvəqqəti sığınacaq almış xarici ölkə vətəndaşlarına şamil olunmayacaq.

Volodin, həmçinin qeyd edib ki, 2024-cü ildən bəri miqrasiya sahəsinə aid 30 federal qanun qəbul edilib.