"Küçələr bərbad vəziyyətdədir" - Sakinlərin yol dərdi - VİDEO

Sabunçu rayonunun Kürdəxanı qəsəbəsində yağışdan sonra küçə və məhəllədaxili yolların vəziyyəti kəskin şəkildə pisləşib. Avtosfer.az xəbər verir ki, Oxu.az-a danışan sakinlərin sözlərinə görə, yağıntılar zamanı yollar su altında qalır, asfalt örtüyü tamamilə sıradan çıxır və bir çox ərazilərdə hərəkət çətinləşir. Məlumata əsasən, bəzi küçələrdə kanalizasiya xətlərinin nasaz olması səbəbindən yerli sakinlər öz imkanları hesabına qazıntı işləri aparıblar. Lakin qazılan sahələr sonradan bərpa edilmədiyindən vəziyyət daha da ağırlaşıb. Qəsəbə sakinləri bildiriblər ki, məsələ ilə bağlı aidiyyəti qurumlara dəfələrlə müraciət olunsa da, problem uzun müddətdir həllini tapmır. Şikayətçilər qeyd edirlər ki, bir neçə il öncə qəsəbədaxili yollar asfaltlanıb. Lakin son yağışlar nəticəsində örtük zədələnib, bir sıra küçələrdə dərin çuxurlar və palçıqlı sahələr yaranıb. Məsələ ilə bağlı aidiyyəti quruma sorğu ünvanlanıb.