Zabrat sakinləri yenə işıqsız qalıb, qurumdan reaksiya yoxdur - ŞİKAYƏT

Paytaxtın Sabunçu rayonu, Zabrat qəsəbəsində artıq bir sutkadan çoxdur ki, elektrik enerjisinin verilməsində fasilələr müşahidə olunur.

Avtosfer.az xəbər verir ki, sakinlər uzun müddətdir davam edən problemin gündəlik həyatlarına ciddi təsir göstərdiyini bildirirlər. Onların sözlərinə görə, elektrik enerjisinin tez-tez kəsilməsi həm məişət avadanlıqlarının istifadəsində çətinlik yaradır, həm də isti hava şəraitində narahatlığı artırır.

Sakinlər bildirirlər ki, məsələ ilə bağlı dəfələrlə "Azərişıq" ASC-nin “199” qaynar xəttinə müraciət ediblər. Onlara verilən cavabda elektrik şəbəkəsində qəzanın baş verdiyi və nasazlığın qısa müddətdə aradan qaldırılması istiqamətində işlərin aparıldığı qeyd olunub.

Qəsəbənin bəzi hissələrində elektrik enerjisinin verilişi bərpa edilsə də, bir çox küçə və yaşayış məntəqəsində problem hələ də qalmaqdadır. Sakinlər problemin qısa zamanda tam həll olunmasını və elektrik təchizatının dayanıqlı şəkildə bərpa edilməsini gözlədiklərini bildirirlər.

Eltac