“2 oğlu var idi, onlar da öldü...” - Bir nəslin qəza faciəsi... - FOTOLAR

Dünən faciəvi şəkildə avtomobil qəzasına düşüb həyatlarını itirən 3 gəncin yas mərasimində ananın ağısı ürəkləri dağladı. Allah heç bir anaya bala dağı göstərməsin. Bir ailədə 3 ölü… Üçü də gənc. Hələ həyatın dadını çıxarmamış əcəl kəməndinə tuş gəldilər… Qohumlarının dediyinə görə, iki qardaş xalası oğlunu əsgəri xidmətdən gətirmək üçün gediblər, amma üçünün də cənazəsi qayıdıb:

“Rövşən xalası oğlu Həsəni hərbi hissədən götürüb evlərinə gətirirmiş. Yolda xalası Nanəyə zəng edib ki, xala, yaxşı bir süfrə aç, ən dadlı yeməkləri bişir, məni gözlə, sənə sürpriz edəcəm. Nanə də tez əl-ayağa düşüb, süfrə düzəldib. Amma gözləyib görüb, Rövşəndən xəbər çıxmayıb. Rövşən xalası ilə telefonda danışıb qurtarandan sonra qəzaya uğrayıb. Deyilənə görə yuxulayıbmış, ona görə də qarşıdakı “Shacman”ın altına giriblər. Ana yazığa xəbər veriblər ki, bəs oğlanların qəzada öldü ”.

Nanə ananın fəryadı ürək parçalayır: “Balamın arzuları yarımçıq qaldı. Deyirdi, ana, evimizə qayıdım, sənə gəlin gətirəcəm”.

İki oğlunu itirən Nərgiz ananı isə heç cür sakitləşdirə bilmirdilər: “İki balam çırağımı söndürdü, daha mən niyə yaşayıram? Rövşən, məni ölüncə yandıracaqsan. Ürəyinə dammışdı bu dünyadan tez köçəcəyi. Yoldaşına mesaj yazıbmış ki, məni tabuta qoyacaqlar, yarımdan ayrı düşəcəm. Balam məni tək qoyub getdi. Rövşənimin 20 günlük körpəsi qaldı. İndi mən ona necə cavab verim? Necə deyim ki, atan əminlə birgə məni yalnız qoyub getdi?”

Qonşuların dediyinə görə, dünən cənazələr həyətə gətiriləndə hər iki ana şok keçirib:

“Yazıqlar özlərini öldürürdülər. Üç cənazəni yanbayan qoydular. Bilinmirdi hansı hansıdır. Analar meyitlərin üstündə saçlarını yolub-tökdülər. Balalarının sonuncu dəfə üzlərini görə bilmədilər. Qohum-əqrəba qoymadı. O maşının içindən çıxan meyit necə olacaqdı? Maşının orta dəmirləri qalmışdı. İçindən çıxara bilməyiblər, maşının doğrayıb, cəsədləri içindən güclə çıxarıblarmış.”

Onu da öyrəndik ki, Rövşən taksi sürücüsü kimi çalışırmış. O, qəzada ölən xalası oğlu Həsənin bacısı ilə ailə qurmuşdu.

Yas mərasimindən uzaqlaşırıq, amma Nərgiz və Nanə ananın ərşi titrədən naləsini eşitməmək üçün qulaqlarımızı tutmaq belə kara gəlmir.

"Behbudun başqa övladı yox idi, elə 2 oğlu vardı, onlar da getdi". Bu sözləri isə Ələtdəki dəhşətli qəzada həlak olan Hacızadə qardaşlarının dayısı "Qafqazinfo"ya deyib. O, bacısı uşaqlarının onlara sürpriz hazırlamaq istədiklərini deyib: “Rövşənin “Daewoo”su var idi, qardaşı ilə danışıblar ki, gedib Həsəni Horadizdən gətirib xalalarına sürpriz etsinlər, heç kimə də deməyiblər. Gələndə Ələtdə yanacaq doldurmaq üçün dayanan yük maşınına dəyiblər. Xalalarına sürpriz etmək istədilər, bütün nəslə “sürpriz” etdilər. Behbudun başqa övladı da yox idi, eləcə 2 oğlu vardı, onlar da getdi. Həsənin də bir bacısı var idi, o da bu cür bədbəxt oldu. Qəzadan bəri təkcə o uşaqlar yox, bütün nəsil ölüb”.

Qeyd edək ki, hadisə Beyləqandan qayıdan “Daewoo” markalı maşının Ələtdə yük maşınına çırpılması nəticəsində olub. Qaradağ rayonunda baş verən qəza zamanı sürücü, 1991-ci il təvəllüdlü Hacızadə Rövşən Behbud oğlu və 1993-cü il təvəllüdlü qardaşı Hacızadə Üzeyir Beyləqanda hərbi xidməti başa vuran xalası oğlanları Həsənov Həsən Bayram oğlu həlak olublar. Xəstəxanaya yerləşdirilən Nicat adlı digər bir şəxsin vəziyyəti ağırdır. Onu da xatırladaq ki, qəzada ölən iki qardaş deputat Şəmsəddin Hacıyevin qardaşı nəvələridir.