Bakıda sürücü sükanı buraxıb klarnet çala-çala getdi - VİDEO

Sənətçilər arasında klarnet ifaçısı kimi tanınan Pərviz Əlikramoğlu sükan arxasında təhlükəli hərəkətlər edərək bu görüntüləri sosial şəbəkələrdə yayıb. Avtosfer.az-ın əldə etdiyi məlumata görə, klarnet ifaçısı Əlikram Quliyevin oğlu olan Pərviz də atasının sənətini davam etdirir. Amma atasından fərqli olaraq lazımsız hərəkətlərlə öyünməyi xoşlayan bu gənc yol hərəkəti qaydalarını da kobud şəkildə pozur. Bu əməli ilə öyünən Pərviz videonu sosial şəbəkələrdə paylaşaraq göstərmək istəyir ki, sükan arxasında da məşq edib klarnet çala bilir. Lakin bu videoda Pərviz Quliyevin pozduğu qaydaları sadalasaq, yəqin ki, utanc hissi keçirəcək və səhvini başa düşərsə, üzr istəməyi də bacaracaq.

İlk növbədə, sükan arxasında təhlükəsizlik kəmərini taxmayıb. Buna görə 40 manat cərimə nəzərdə tutulur. Sükan arxasında sürücünün diqqətini yayındıran söhbətdə iştirak edir. Eyni zamanda, əlini dəfələrlə sükandan çəkir. Bu xətaların da hər birinə görə 40 manat cərimə nəzərdə tutulur. Bundan əlavə, o, lüzumsuz yerə səs siqnalından istifadə edir. Buna görə də 30 manat cərimə tətbiq edilə bilər. Yəni, bu videoda həmin sürücünün 150 manatlıq qayda pozuntusu faktı mövcuddur. Hansı ki, bu, olmaya da bilərdi. 

Ümumiyyətlə isə Pərvizin sürücülük hüququnun olub-olmaması sual altındadır…

Elməddin