Ekspert avtomobil həvəskarlarına səsləndi: "Elektromobilləri seçin

Avtomobillərin, xüsusən də mühərrikinin iş həcmi böyük olan avtomobillərin idxalı ilə bağlı rüsum və vergilər artmaqda davam edir. Bu, dövlətin iqtisadi maraqları ilə bağlı məsələdir, onu iqtisadçıların öhdəsinə buraxaq...

Mən isə avtomobillərə aid müxtəlif sahələrdə biznes quranlara və avtomobil əldə etmək istəyənlərə bir tövsiyə vermək istərdim.

Hörmətli biznesmenlər və avtomobil həvəskarları, yubanmadan hədəfiniz olaraq elektromobilləri seçin. Lap yaxın perspektivdə bütün dünyada onlar populyar olacaq. Kim qabağa düşsə, udacaq. Nəzərə alın ki, hazırda ölkəmizə avtomobil idxalı ilə bağlı aksiz vergisi və gömrük rüsumu mühərrikin iş həcmi ilə hesablanır. Elektromobildə isə daxili yanma mühərriki olmadığından həmin vergi və rüsumlar yox dərəcəsindədir. Sadəcə olaraq onlara texniki qulluq infrastrukturu və enerji təminatını qurmaq, bu nəqliyyatı populyarlaşdırmaq lazımmdır. Düzdür, hələlik belə avtomobillər bahadır, amma inkişaf ucuzlaşmaya doğru gedəcək. Bu labüddür.

Şəxsən mən hələ 9 il öncə indi istifadə etdiyim avtonu alanda dostlara yarızarafat demişdim ki, növbəti avtomobilim, qismət olsa, elektromobil olacaq. İndi baxıram ki, bu gerçəkliyə oxşamağa başlayıb.

Nəzərə alın ki, ölkəmizdə avtomobilləşmə səviyyəsi cəmi 15% civarındadır. Potensial olara bu rəqəm 60%-ə çata bilər. Yəni ölkəmizin avtomobilləşməsi hələ qabaqdadır...

Ərşad Hüseynov

Yol hərəkəti təhlükəsizliyi üzrə ekspert