"Kapital Bank" köçürmə limitini niyə 3 minə endirdi? - İLGİNC SƏBƏBLƏR

“Kapital Bank”ın debet kartlarında nağdlaşdırma və köçürmə limiti 5000 AZN-dən 3000 AZN-ə endirilir. Bundan əlavə, başqa bank ATM-lərindən nağdlaşdırma zamanı minimum 2 AZN olmaqla 1 faiz komissiya tutulacaq.

Maraqlıdır, gələcəkdə eyni bankın ATM-lərində də əlavə komissiya tətbiq edilə bilərmi? Limitin azaldılması fonunda rəqəmsal ödənişləri stimullaşdırmaq üçün hansı yeni xidmətlər və ya güzəştlər təklif oluna bilər? “Kapital Bank” bu addımı niyə atıb?

Avtosfer.az-ın məlumatına görə, mövzu ilə bağlı iqtisadçı ekspert Əkrəm Həsənov Konkret.az-a açıqlamasında bildirib ki, hazırda istənilən halda nağdlaşdırmada komissiya mövcuddur, yalnız pensiya və maaş kartlarında bu rüsumu vətəndaş hiss etmir:

“Pensiya və maaş kartlarında komissiya var, sadəcə həmin məbləği pensiya fondu və ya işəgötürən banka ödəyir. Kapital Bankın yeni qərarında isə vətəndaş başqa bankın ATM-indən pul çıxaranda 1 faiz komissiya ödəyəcək. Gələcəkdə isə eyni bank ATM-lərində də əlavə komissiya tətbiq oluna bilər. Qanunvericilik bankları bu məsələdə məhdudlaşdırmır. İstənilən komissiyanı tətbiq edə bilərlər, sadəcə banklar arasındakı rəqabət bunu müəyyən qədər məhdudlaşdırır”.

Ekspertin sözlərinə görə, limitin azaldılması köçürmə əməliyyatlarında sui-istifadə hallarının və oğurluq riskinin azaldılması məqsədi daşıyır:

“Komissiya tətbiqinin əsas səbəblərindən biri də müştərilərin digər bankların ATM-lərindən istifadə etməsinin qarşısını almaqdır. Güzəştlər isə əvvəlki illərdə olduğu kimi ödəniş vərdişini formalaşdırmaq üçün edilirdi, indi belə bir ehtimal görmürəm”.