Sürücülər cəriməni vaxtında ödəmir - Əziyyəti isə sərnişinlər çəkirlər - VİDEO

Marşrut avtobuslarının sürücüləri cərimələri vaxtında ödəmir, bunun əziyyətini isə sərnişinlər çəkirlər. Çünki yol polisi cəriməsi ödənməyən avtobusu elə xəttə ikən saxlayır və sürücüləri düşürüb avtobusu cərimə meydançasına aparır...

Son vaxtlar belə faktlara tez-tez rast gəlinir. Bu isə sərnişinlərdə narazılıq yaratmaqla yanaşı, əlavə vaxt itkisinə də səbəb olur

Yol hərəkəti üzrə ekspert Ərşad Hüseynov deyir ki, bu məsələ qanunvericiliklə tənzimlənir. Cəriməsi olan avtobusdakı sərnişinlərin yolda düşürülməsi düzgün deyil.

Bununla bərabər, polis əməkdaşı saxlanılan avtobusun yerinə xəttə yeni avtobusun buraxılmasını sahibkara bildirməlidir.

Bakı Şəhər Dövlət Yol Polisi İdarəsinin bölmə rəisi Vaqif Əsədov isə deyir ki, bütün nəqliyyat vasitələrinin sürücüləri törətdikləri qayda pozuntusuna görə, cərimələri mütləq gecikdirmədən ödəməlidirşər. Əks halda həmin nəqliyyat vasitələri polis əməkdaşları tərəfindən saxlanılaraq mühafizə olunan duracağa aparılacaq. O ki, qaldı avtobuslar xəttə olarkən saxlanılaraq sərnişinlərin yolda düşürülməsinə, Vaqif Əsədov deyir ki, polis əməkdaşları cəriməsi olan avtobusları son dayanacağa qədər təqib etməlidir. Yalnız sərnişinlər düşdükdən sonra avtobus cərimə meydançasına aparıla bilər.