Şüurlu halda özlərini maşının altına atırlar - Bakıda kütləvi psixioz - FOTOLAR

Bu gün DİN Baş Dövlət Yol Polisi İdarəsinin (DYP) əməkdaşları paytaxtın "20 Yanvar" metrostansiyası yaxınlığında, Bayraq Meydanı ərazisi və Fəhlə prospektində piyadalarla bağlı reyd keçiriblər. Reyd ilk olaraq "20 Yanvar"dan başladı. Reyddə ilk dəfə olaraq Yol Patrul Xidmətinin (YPX) qadın əməkdaşı iştirak edirdi. Polis baş serjantı Turan Daşdəmirova reyd zamanı qaydaları pozan xanım piyadaları saxlayır, onlara qanun haqqında məlumat verir, təbliğat aparır və qayda pozan piyadalara inzibati xəta protokolu tətbiq edirdi.

Nə qədər qəribə olsa da, reyd zamanı saxlanılan piyadaların əksəriyyəti qaydalardan xəbərsiz olduqlarını dilə gətirirdilər. Həyatını təhlükəyə atıb, "20 Yanvar" dairəsində özünü avtomobillərin qarşısına ataraq yolu keçməyə çalışan piyadaların piyada keçidindən keçməmək üçün müxtəlif bəhanələri var idi. Bəzisi belinin ağrıdığını deyir, bəzisi də ərazidə piyada keçidinin olmasından xəbərsiz olduğunu, digəri də tələsdiyini bəhanə gətirərək özlərinə haqq qazandırmağa çalışırdılar.

Çoxu özünü təqdim etmək istəmirdi, təqdim etdikləri zaman isə ad və soy adlarını düzgün demirdilər. "20 Yanvar" dairəsində başlayan reyd, tez-tez piyada vurulması ilə gündəmə gələn Bayraq Meydanı və Fəhlə prospektində davam etdi. YPX-nin əməkdaşları qayda pozan piyadalara yaxınlaşaraq əvvəlcə məlumat verir, sonra cərimə tətbiq edirdilər.

Reydlər zamanı qayda pozan piyadaların çox az hissəsi səhvini etiraf edir və bu halın bir daha təkrar edilməyəcəyini bildirirdi. Bəzi piyadalar isə özlərini haqlı çıxarmağa çalışır, polisin əmrinə tabe olmaq istəmirdilər.

Reyddə Baş Dövlət Yol Polis İdarəsinin Hərəkətin təhlükəsizliyinin təbliği və ictimai qurumlarla əlaqələr şöbəsinin baş inspektorları, polis polkovnik leytenantı Səbri Hüseynov və İsa Deyistani iştirak edirdi.

Reyddə iştirak edən "Jurnalistika və İnkişaf" İctimai Birliyinin sədri Elməddin Muradlı Sputnik Azərbaycan-a açıqla verdi. O bildirdi ki, bəzi hallarda piyadalarla bağlı vəziyyət dəhşətli dərəcədə narahatlıq yaradır. "Keçidin yanında yola çıxan insanları başa düşmək olmur. Sual verirsən, deyir ki, "rayondan gəlmişəm", "xəstəyəm" və s. Belələrinin maarifləndirilməsinə ehtiyac var" — Muradlı qeyd etdi. Onun sözlərinə görə, əvvəlcə güclü təbliğat aparmaq lazımdır: "Bununla yanaşı, cərimələrə də xüsusi diqqət yetirilməsinin tərəfdarıyam. Reyddə gördük ki, keçid olduğunu görə-görə özünü yola atan və bunu şüurlu şəkildə edən insanlar var. Belələrini 50-100 manat məbləğində cərimələmək lazımdır ki, bir daha belə qayda pozmasınlar".

Xatırladaq ki, İnzibati Xətalar Məcəlləsinin 338-ci maddəsinə görə, piyadalar tərəfindən yol hərəkəti qaydalarının pozulmasına, yəni piyada svetoforunun və ya nizamlayıcının işarələrinə riayət edilməməsinə, yolda yaxınlaşmaqda olan nəqliyyat vasitələrinin qarşısına qəflətən çıxılmasına, qırmızı və ya göy sayrışan işıq və xüsusi səs siqnalı qoşulmuş nəqliyyat vasitəsi yaxınlaşan zaman hərəkət hissəsinin tərk edilməməsinə görə iyirmi manat məbləğində cərimə edilir.