Turizm zonasının "analoqu olmayan" yolu - VİDEO

Bütün dünyada turizm məkanlarına aparan yollar yüksək səviyyədə təmir edilir. Çünki istirahətə gələn turistlər üçün ilk növbədə yolun rahatlığı önəm kəsb edir. Turist daha çox dincəlmək üçün həmişə ən qısa marşrut və tez çata biləcəyi məkanı seçir. Odur ki, dünyanın turizmi inkişaf etdirən ölkələrində ilk iş yol çəkmək olur. Amma təəssüflər olsun ki, ölkəmizdə turizmin inkişafına dövlət tərəfindən hərtərəfli dəstək  verilsə də bir sıra məmurların “səyi” nəticəsində bu sektora ciddi zərbə vurulur. 

Avtosfer.az bir müddət əvvəl “Xaçmazda biabırçılıq: Turizm mövsümündə yollar niyə qazılır? – VİDEO” başlıqlı yazı dərc etmişdi. Hələ bir ay əvvəl turizm mövsümünün yaxılaşdığı bir vaxtda Xaçmaz-Yalama yolunun təmirə bağlanması və mövcud yolun yarasız vəziyyətə salınması barədə videomaterial (Ətraflı bu linkdə: http://avtosfer.az/news/37344) təqdim etmişdik. Lakin təəssüflər olsun ki, mövcud vəziyyət dəyişmək əvəzinə bir qədər də pisləşib. Sürücülərdən biri elektron ünvanımıza video göndərib və qeyd edib ki, bir neçə gün əvvəl getdiyi 22 km-lik Quba-Xaçmaz yolunun 17 km-i hələ də bərbad vəziyyətdədir. Yollada avtomobil idarə etmək demək olar ki, mümkün deyil. 

Qeyd edək ki, Bakı-Quba yolunun paytaxt istiqamətində olan hissəsinin bərbad vəziyyətdə olması barədə sürücülərin çoxsaylı şikayəti var. Eyni zamanda Quba-Xaçmaz istiqamətində yolun belə vəziyyətdə turizm zonasına  gedənlərin sayına ciddi dərəcədə təsir edir. 

Ümid edirik ki, aidiyyəti qurumlar bu barədə təcili ölçü götürəcəklər. Hərçənd ki, cəmi 1 aylıq turizm sezonunda bunu necə edəcəkləri də sual altındadır. Avtosfer.az sözügedən yolun hazırkı durumunu əks etdirən videonu təqdim edir: