Yanacaqdoldurma məntəqələrində əməliyyat: Sayğaca necə “əl gəzdirirlər?”

Yanacaqdoldurma məntəqələrində vətəndaşları aldatma halı gedikcə daha da artır. Bununla bağlı yayılan son videogörüntüdə aldatmanı açıq-aşkar müşahidə etmək mümkündür. Vətəndaş 65 litir yanacaq tutan avtomobilin çəninə yanacaq doldurma məntəqəsində 75 litir yanacaq vurulması haqda görüntüləri yayımlayıb.

Nəqliyyat üzrə ekspert Ərşad Hüseynov Cebhe.info-ya bu cür halların tez-tez baş verdiyini bildirib. Onun sözlərinə görə, bunu edənlər kriminal niyyətli adamlardır: “İnsanın əlində hər şey mümkündür. Yanacaqdoldurma aparatlarında sayğac var. Həmin elektron sayğac sərf olunan yanacağı hesablayır. Ona bir az “əl gəzdirirlər”, necə istəyirlər sayğac da o cür hesablayır. Sayğacın tutum dərəcəsini pozurlar. Ümumiyyətlə, kriminal niyyətli adamlar çox istedadlı olurlar. Aparat rəqəmsal olarsa, yaddaşına, mexaniki olarsa, barometrlərinə müdaxilə edirlər. Bunlar xüsusi “istedaddır” ki, onu da ancaq kriminal niyyətli adamlar bacarır”.