Bakıda tramvayların fəaliyyəti tıxac problemini həll edə bilər? - ARAŞDIRMA

Paytaxtətrafı qəsəbələrin nəqliyyat əlçatanlığının yaxşılaşdırılması istiqamətində müzakirə olunan tramvay layihəsinin ilkin mərhələdə məhz Mehdiabad istiqamətində planlaşdırılması təsadüfi hesab edilmir. 

Avtosfer.az xəbər verir ki, "Urbanblog.az"-ın səhifəsinin əldə etdiyi məlumata görə, ərazi Bakıya coğrafi baxımdan yaxın olsa da, uzun illərdir keyfiyyətli və etibarlı ictimai nəqliyyat baxımından məhdud imkanlara malikdir.
Qeyd olunur ki, Mehdiabadda əhalinin sıx məskunlaşması gündəlik hərəkət tələbatını əhəmiyyətli dərəcədə artırır. Lakin mövcud avtobus marşrutları artan tələbi tam şəkildə qarşılaya bilmir. Pik saatlarda müşahidə olunan sıxlıq, intervalın qeyri-sabitliyi və tıxacdan asılılıq sakinlərin mobilliyini zəiflədir, şəhər mərkəzinə çatma müddətini uzadır.

Məhz bu səbəbdən relsli nəqliyyat – tramvay sistemi daha dayanıqlı və uzunmüddətli həll kimi ön plana çıxır. Nəqliyyat üzrə ekspertlər hesab edirlər ki, tramvay xətti bir neçə mühüm üstünlük vəd edir. İlk növbədə, daha yüksək daşıma qabiliyyəti sərnişin axınının effektiv idarə olunmasına imkan verəcək. Eyni zamanda, sabit hərəkət qrafiki ictimai nəqliyyatın etibarlılığını artıracaq və pik saatlarda yaranan yüklənməni azaldacaq.

Bundan başqa, tramvay sisteminin tətbiqi ümumi nəqliyyat şəbəkəsinin səmərəliliyini gücləndirə, avtobus marşrutlarının optimallaşdırılmasına şərait yarada bilər. Mütəxəssislərin fikrincə, relsli nəqliyyatın istifadəyə verilməsi Mehdiabad və ətraf yaşayış massivlərinin şəhərlə inteqrasiyasını sürətləndirəcək, ərazinin sosial-iqtisadi inkişafına müsbət təsir göstərəcək.

Beləliklə, Mehdiabad istiqamətinin tramvay üçün pilot zona kimi seçilməsi mövcud nəqliyyat boşluğunun aradan qaldırılması və uzunmüddətli urban mobillik strategiyasının formalaşdırılması baxımından əsaslandırılmış addım kimi qiymətləndirilir. Layihənin detalları və icra müddəti ilə bağlı rəsmi açıqlamaların verilməsi gözlənilir.

Eltac Zülfüqaroğlu