Sürət həddini aşan avtomobillərin mühərrik gücü azaldılacaq? – RƏSMİ

Avropa Komissiyası yol hərəkəti təhlükəsizliyini artırmaq məqsədilə yeni avtomobillərdə sürət həddini aşan sürücülərin mühərrik gücünü avtomatik azaldan peyk dəstəkli sistemin tətbiqini nəzərdən keçirir.

Avtosfer.az xəbər verir ki, hazırda müzakirə mərhələsində olan bu təşəbbüs avtomobil istehsal standartlarına və sürücülərin idarəetmə vərdişlərinə ciddi təsir göstərə biləcək yeniliklərdən biri hesab olunur.

Məlumata görə, sistem peyklər vasitəsilə avtomobilin yerini real vaxt rejimində müəyyən edəcək. Nəqliyyat vasitəsi aşağı sürət həddi tətbiq olunan əraziyə daxil olduqda, sistem mühərrikin gücünə müdaxilə edərək avtomobilin sürətini avtomatik şəkildə məhdudlaşdıracaq.

Yeni texnologiya yalnız GPS məlumatlarından istifadə etməyəcək. Sistemin daha dəqiq işləməsi üçün 5G mobil rabitə siqnallarından da yararlanılacaq. Avtomobil rəqəmsal xəritələr vasitəsilə həmin ərazidə qüvvədə olan sürət həddini müəyyən edəcək, xüsusi kameralar isə yol nişanlarını oxuyaraq məlumatları müqayisə edəcək.

Layihəyə əsasən, fövqəladə hallarda sürücüyə qısa müddət ərzində müəyyən edilmiş sürət həddini aşmağa icazə veriləcək. Lakin bu imkan məhdud vaxt üçün nəzərdə tutulub və sistem daha sonra avtomatik olaraq yenidən sürəti tənzimləyəcək.

Avropa Komissiyası bu texnologiyanın 2030-cu ildən etibarən yeni istehsal olunan avtomobillərdə məcburi tətbiqini hədəfləyir.

Yol təhlükəsizliyi üzrə təşkilatlar hesab edirlər ki, bu sistemin tətbiqi sürət həddinin aşılması nəticəsində baş verən ölümcül yol-nəqliyyat hadisələrinin sayını təxminən 20 faiz azalda bilər.

Bununla yanaşı, mütəxəssislər texnologiyanın bəzi risklər də daşıdığını bildirirlər. Sistem kibertəhlükələrə məruz qala və ya sürət həddini yanlış müəyyən edə bilər. Belə hallarda avtomobilin qəfil yavaşıması yeni qəzalara səbəb ola bilər.

Araşdırmalar göstərir ki, hazırda istifadə olunan ağıllı sürət köməkçisi sistemləri hər dörd sürət həddi dəyişikliyindən birini düzgün müəyyən edə bilmir.

Avropa Komissiyası isə bildirib ki, sözügedən təşəbbüs hələ ilkin müzakirə mərhələsindədir və ekspertlərlə aparılan görüşlər araşdırma xarakteri daşıyır.

Eltac Zülfüqaroğlu