Sürücü və piyadalara çətinlik yaranan kəsişmədə yeni svetoforlar quraşdırıldı - VİDEO

Sürücü və piyadalara çətinlik yaranan kəsişmədə yeni svetoforlar quraşdırılıb.

Avtosfer.az xəbər verir ki, Bakının Binəqədi rayonunda nəqliyyatın axınını tənzimləmək və piyadaların təhlükəsizliyini artırmaq məqsədilə yeni svetoforlar istifadəyə verilib.

Belə ki, Əcəmi Naxçıvani küçəsi ilə Ağasadıq Gəraybəyli küçəsinin kəsişməsində quraşdırılan svetoforlar sayəsində nəqliyyat vasitələrinin hərəkəti asanlaşıb, sürücü və piyadalar üçün yaranan çətinliklər aradan qaldırılıb.

Nəqliyyatı İntellektual İdarəetmə Mərkəzinin (NİİM) apardığı monitorinqlərin nəticəsinə əsasən, həmin ərazidə müşahidə olunan xaotik vəziyyətin qarşısı tamamilə alınıb.

Bundan əlavə, Binəqədi rayonunun Şah Abbas və Babək küçələrinin kəsişməsində də yeni svetoforlar quraşdırılaraq hərəkət iştirakçılarının istifadəsinə verilib.

NİİM tərəfindən paytaxt ərazisində yol hərəkətinin təhlükəsizliyinin təmin edilməsi istiqamətində tədbirlərin davam etdiriləcəyi bildirilib.