Şəkidə yarımçıq təmir sürücüləri əks yola çıxmağa məcbur edir: “Sağ-sol” edib keçirlər - VİDEO

Şəkidə yolun hərəkət hissəsində aparılan təmir işlərinin yarımçıq saxlanılması sürücülər üçün ciddi çətinlik yaradır.

Avtosfer.az-ın məlumatına görə, bu barədə ərazidən keçən sürücülərdən biri sosial şəbəkə hesabında paylaşım edib.

Kadrlardan görünür ki, yolun hərəkət hissəsində bir neçə yerdə asfalt-beton örtüyünün dağılmış hissələri var. Həmin ərazilər xəbərdarlıq lenti ilə əhatəyə alınsa da, sürücülərin təhlükəli hissələr barədə əvvəlcədən məlumatlandırılması üçün xəbərdaredici nişanların və istiqamətləndirici nişanlanmanın olmadığı görünür.

Bu isə sürücülərin sözügedən hissələrə yaxınlaşarkən qəfil manevrlər etməsinə səbəb olur. Belə ki, onlar gah sağa, gah sola manevr edərək əks istiqamətli yola çıxmalı olurlar.

Xüsusilə gecə saatlarında yolun bu vəziyyətdə olması təhlükəni daha da artırır. Ərazini tanımayan sürücülər üçün isə belə maneələr qəza riskini əhəmiyyətli dərəcədə yüksəldir.

Şahidlərin iddiasına görə, sözügedən mənzərə artıq bir neçə aydır davam edir. Bildirilir ki, yolun asfalt örtüyü yenilənsə də, hərəkət hissəsində yaranmış bu maneələr aylardır aradan qaldırılmayıb.

Aidiyyəti qurumların sürücülərin təhlükəsizliyinin təmin olunması üçün ərazidəki problemin aradan qaldırılması və zəruri yol nişanlarının quraşdırılması istiqamətində tədbir görməsi vacibdir.

Nərmin