"Yol hərəkəti təhlükəsizliyində piyadaların rolu" - FOTO

Şəki Şəhər-Rayon Polis Şöbəsinin rəisi, polis polkovniki Əbülfət Rzayevin göstərişi və nəzarəti altında rayonun ümumtəhsil məktəblərində eləcə də, universitet  və kolleclərdə "Gənclər narkomaniyaya yox deyir", "Dini radikalizmə qarşı mübarizə hər birimizin borcudur", "Erkən nikah və onun fəsadları", "Yol hərəkətinin təhlükəsizliyində piyadaların rolu" mövzularında tədbirlərin, tərtib edilmiş cədvəl üzrə keçirilməsi nəzərdə tutulub. Növbəti tədbirlərŞəki rayonu, Turan qəsəbə tam orta məktəbində və İnçə kənd tam orta məktəbində keçirilib.
Turan qəsəbə tam orta məktəbində keçirilən tədbirdə Şəki RPİ-nin rəisi, polkovnik Əbülfət Rzayev, Şəki rayon prokuroru, baş ədliyyə müşaviri Elmar Camalov və Dövlət Yol Polis Bölməsinin təbliğat və təşviqat üzrə inspektoru, polis baş leytenantı Tural Niftalıyev çıxış edib.
İnçə kənd tam orta məktəbində keçirilən tədbirdə isə Şəki Şəhər Təhsil Şöbəsinin məsləhətçisi Anar Məmmədov, Şəki DYP-nin inspektoru Tural Niftalıyev, azyaşlılar üzrə inspektorlar, baş leytenant Anar Xalıqov və Səlim Səlimov çıxış edib.
Hüquq mühafizə orqanlarının rəhbərliyi və əməkdaşları, keçirilən tədbirlərdə çıxış edərək qeyd olunan mövzularla bağlı məktəblilərə ətraflı məlumatlar veriblər.
Polis baş leytenantı Tural Niftalıyev təhsil müəssisələrinin direktorlarına Baş Dövlət Yol Polisi İdarəsi tərəfindən hazırlanmış ibtidai siniflər üçün dərs vəsaiti olan “Yol Hərəkətinin Əlifbası” kitabını hədiyyə edib.
Tədbirlərin yekununda, mövzularla bağlı məktəbliləri maraqlandıran suallar ətraflı cavablandırılıb, bu istiqamətdə tədbirlərin mütəmadi olaraq rayonun digər təhsil müəssisələrində də keçiriləcəyi qeyd olunub.

Emin