Yol qəzalarında ölüm və xəsarətlərin sayı azaldı - Vilayət Eyvazov AÇIQLADI

Daxili İşlər Nazirliyində keçirilən növbəti Kollegiya iclasında ölkədə kriminogen vəziyyət, ictimai asayişin qorunması və müxtəlif istiqamətlər üzrə görülən işlərlə yanaşı, yol hərəkəti təhlükəsizliyi sahəsindəki son vəziyyət də müzakirə olunub.
Avtosfer.az xəbər verir ki, iclası giriş sözü ilə açan Vilayət Eyvazov bildirib ki, 2026-cı ilin birinci rübündə yol-nəqliyyat hadisələrinin qarşısının alınması istiqamətində həyata keçirilən tədbirlər müsbət nəticə verib.
Nazirin sözlərinə görə, hesabat dövründə yol-nəqliyyat hadisələrinin sayı 15 fakt azalıb. Bununla yanaşı, baş verən qəzalar nəticəsində həyatını itirənlərin sayı 9 nəfər, müxtəlif dərəcəli bədən xəsarətləri alanların sayı isə 44 nəfər az olub.
Qeyd edilib ki, yol hərəkəti təhlükəsizliyinin təmin olunması, sürücülərin və piyadaların intizamının artırılması, eləcə də profilaktik tədbirlərin gücləndirilməsi bu sahədə müsbət dinamikanın formalaşmasına təsir göstərib. Eyni zamanda, aidiyyəti qurumlar tərəfindən nəzarət tədbirlərinin davam etdirildiyi və bu istiqamətdə işlərin daha da gücləndiriləcəyi vurğulanıb.