Yola çıxmazdan əvvəl işıq cihazlarını yoxlayın - DYP-dən ÇAĞIRIŞ

Daxili İşlər Nazirliyinin Baş Dövlət Yol Polisi İdarəsi sürücülərə müraciət edərək yola çıxmazdan əvvəl nəqliyyat vasitələrinin texniki vəziyyətinə, xüsusən də xarici işıq cihazlarının sazlığı və təmizliyinə diqqət yetirməyə çağırıb.

Avtosfer.az xəbər verir ki, ön və arxa fənərlər, dönmə işıq göstəriciləri, geriyə hərəkət və işıqqaytarıcı sistemlər yalnız yolu deyil, həm də sürücünün və digər hərəkət iştirakçılarının təhlükəsizliyini təmin edir.

Məlumata görə, sutkanın qaranlıq vaxtı, eləcə də dumanlı və yağışlı havalarda işıq cihazlarının düzgün işləməməsi görmə məsafəsini azaldır və qəza riskini artırır.

“Unutmayaq ki, təhlükəsiz yol hər birimizin məsuliyyətidir”, – deyə DYP bildirir.