Azərbaycanda populyar olmayan sovet avtomobilinin ad günü - FOTOLAR

1971-ci il aprelin 28-də Volqa Avtomobil Zavodunun konveyerini ilk VAZ-2102 tərk etdi. 

Avtosfer.az xəbər verir ki, bu model əslində “Fiat 124 Familiare”nin sovet reallığına uyğunlaşdırılmış versiyası idi. Avtomobilin kütləvi istehsalı sentyabrda başladı və ilin sonunadək 350 maşın sahiblərinə çatdı.

Sovet İttifaqında bundan əvvəl də universal kuzovlu avtomobillər istehsal olunurdu. Lakin 2102 say və populyarlıq etibarı ilə bütün modelləri üstələdi. 1984-cü ildə onun bazasında VAZ-2104 istehsal edilməyə başladı. Hər 2 model 2 il paralel istehsal edildikdən sonra VAZ-2102 konveyeri 1986-cı ildə tərk etdi.

16 il ərzində bu avtomobil 666 989 ədəd istehsal edilib ki, bunun da böyük qismi ixrac edilib. Digər sovet respublikalarından fərqli olaraq Azərbaycan SSR-də bu model populyarlıq qazanmayıb (eyni fikri 2104 üçün də söyləmək mümkündür). Oxşar texniki xüsusiyyətlərə malik VAZ-2101 və VAZ-21011 daha çox sevilib.

Vüqar