Bu ölkədə svetofor milli dəyərlərə zidd hesab olunur - FOTOLAR

Himalay dağlarının əhatəsində yerləşən bu ölkənin adına xəbərlərdə çox da rast gəlinmir. 38 min kvadrat kilometr ərazisi olan ölkədə siyasi sabitlik mövcuddur, dünya ilə əlaqə bizim səviyyədə deyil. Amma söhbət bundan getmir. 

Avtosfer.az xəbər verir ki, Butan Krallığı dünyada svetofor olmayan azsaylı ölkələrdəndir. Doğrudur, bəzi cırtdan dövlətlərdə belə bir avtomatik tənzimləyicinin yoxluğu tam normaldır.  Amma Butanda əhali sayı 1 milyon nəfərə yaxınlaşır. 
1995-ci ildə bu ölkənin paytaxtı Trimphuda ilk svetoforun quraşdırılması ciddi narazılıq yaratdı. Əhali iddia edirdi ki, svetofor ruhsuzdur, milli ənənəyə uyğun deyil. Narazılıq o həddə çatdı ki, polis svetoforu işə saldıqdan 3 saat sonra söndürməli oldu. Ertəsi gün isə onu tamamilə demontaj etdilər.
İndi yol ayrıclarında hərəkəti yol polisinin əməkdaşları tənzimləyirlər. Onlar hər 30 dəqiqədən bir dəyişdirilir.
Ölkədə avtomobilləşmə də çox ləng gedir. İdxal rüsumları çox böyük olan krallığa yalnız təzə avtomobil gətirilməsinə icazə verilir.

Vüqar