Ayaqlarını maşının pəncərəsindən sallayan sərnişin CƏZALANDIRILDI - VİDEO

Bakı-Quba avtomobil yolunda qayda pozan sərnişin kameraya düşüb.

Avtosfer.az-a izləyicilərdən biri tərəfindən göndərilən videomaterialda 27-BV-757 dövlət qeydiyyat nişanlı “QAZ-2752” markalı avtomobilin sərnişininin ayaqlarını avtomobilin pəncərəsindən çölə çıxararaq hərəkət etdiyi əks olunub. Şikayətçinin sözlərinə görə, həmin şəxs yolboyu eyni təhlükəli davranışı davam etdirib.

Məsələ ilə bağlı Avtosfer.az Baş Dövlət Yol Polisi İdarəsinə müraciət edib. İdarənin Yol Patrul Xidməti Alayından bildirilib ki, araşdırma zamanı qayda pozan şəxsin Xaçmaz rayon sakini Aydınov Aydın Tofiq oğlu olduğu müəyyən edilib.

Alayın əməkdaşları tərəfindən həmin şəxs barəsində qanunvericiliyə uyğun inzibati tənbeh tədbiri görülüb. O, törətdiyi hərəkətdən peşman olduğunu bildirərək, bir daha belə qayda pozuntusuna yol verməyəcəyini deyib.

Qeyd edək ki, hərəkətdə olan nəqliyyat vasitəsindən bədənin hər hansı hissəsini avtomobilin pəncərəsindən çölə çıxarmaq sərnişinin həyat və sağlamlığı üçün ciddi təhlükə yaradır. Belə məsuliyyətsiz davranış qəfil manevr, toqquşma və ya digər yol-nəqliyyat hadisəsi zamanı ağır nəticələrə səbəb ola bilər.

Nərmin