Bu yolayrıcında sürücülər tez-tez qəza törədir - Səbəb nədir? - VİDEO

Paytaxtın Xətai rayonu, Cavanşir küçəsində baş vermiş qəza anbaan kameraya düşüb.

Bu barədə izləyicilərdən biri Avtosfer.az-a videomaterial göndərib. Kadrdan da göründüyü kimi, yolayrıcına daxil olan “Mercedes” markalı avtomobil, “Bolt” taksi şirkətinə məxsus “BYD” markalı maşınla toqquşub. “BYD”nin sürücüsü qəzadan yayınmaq üçün sağa manevr etsə də təhlükədən xilas ola bilməyib. Nəticədə o, öncə “Mercedes”ə çırpılıb, ardınca yol kənarında quraşdırılmış piyada keçidi nişanına dəyərək onu kökündən qoparıb.

İzləyici bildirib ki, sözügedən küçədə tez-tez yol-nəqliyyat hadisələri qeydə alınır. Səbəb isə yolayrıcına girən sürücülərin diqqətsizliyi və növbəsini gözləmədən hərəkətlərinə davam etmələridir.

Nəzərə alsaq ki, qəzanın baş verdiyi yolayrıcı nizamlanmayıb, üstünlük nişanı yoxdur, bu halda “BYD” markalı avtomobilin sürücüsü sağ tərəfdən gələn nəqliyyat vasitəsinə yol verməli idi.

Nərmin