Mərdəkanda təhlükəli manevr edən sürücü qəza şəraiti yaratdı, ardınca… - VİDEO

Paytaxtın Xəzər rayonu, Mərdəkan qəsəbəsində qaydaları kobud şəkildə pozan sürücü kameraya düşüb.

Avtosfer.az-ın məlumatına görə, hadisə martın 9-da saat 22:36 radələrində Sergey Yesenin küçəsində qeydə alınıb. Görüntüdən aydın olur ki, 77-LS-665 dövlət qeydiyyat nişanlı “Chevrolet Cruze” markalı avtomobilin sürücüsü əvvəlcə manevr qaydasını pozub. Belə ki, o, hərəkətdə olduğu zolaqdan qəfil sağa manevr edib və bu zaman həmin zolaqdakı sürücü üçün təhlükəli vəziyyət yaradıb.

Kameraya düşən kadrlardan görünür ki, təhlükəylə üzələşən sürücü vaxtında dayanmaqla baş verəcək qəzanın qarşısını ala bilib.

Qayda pozan sürücü bununla da kifayətlənməyib. Ardınca o, avtobus dayanacağı nişanının tələbinə məhəl qoymayaraq avtomobilini dayanacaqda park edib.

Qeyd edək ki, qanunvericiliyə əsasən, bütöv xətlə ayrılmış zolaqlarda manevr etmək qadağandır. Bundan əlavə, minik avtomobilləri avtobus dayanacağından ən azı 15 metr əvvəl və ya 15 metr sonra dayanmalı və ya park edilməlidir. Bu tələblərə əməl olunmaması yol hərəkəti qaydalarının pozulması hesab olunur.

Nərmin