102 min “BMW” geri çağırıldı

Almaniyanın məşhur avtomobil istehsalçısı “BMW” Cənubi Koreyada 102 min 468 avtomobili geri çağırıb. Avtosfer.az Axar.az-a istinadən xəbər verir ki, səbəb sözügedən avtomobillərin qaz dövriyyəsi sistemindəki soyuducu maye çatışmazlığı və qüsurlu klapanlardır.

Belə ki, ötən il Cənubi Koreyada 40-a yaxın “BMW” avtomobilinin mühərrikində yanğın baş vermişdi. Bu səbəbdən avtomobil sahibləri istehsalçı şirkəti məhkəməyə vermiş və maddi və mənəvi ziyana görə hər adama 15 milyon Koreya vonu (13,5 min ABŞ dolları) kompensasiya tələb edirdilər. Baş verən yanğından sonra mütəxəssislərdən və dövlət qurumlarının əməkdaşlarından ibarət qrup araşdırma aparmışdı. Araşdırmanın nəticəsindən sonra şirkətin qüsurlu avtomobilləri geri çağırması barədə qərar qəbul olunmuşdu.

Ötən ilin avqustunda başlayan proses çərçivəsində birinci mərhələdə qüsurlu hesab edilən təxminən 102 min avtomobilin indiyədək 94 faizi geri çağırılaraq, nasaz hissələr dəyişdirilib.

Qeyd edək ki, sözügedən yanğın faktları Cənubi Koreyada “BMW” avtomobillərinin satışının azalmasına təsir edib. Şirkətin yaydığı məlumatda deyilir ki, bu ilin yanvar-mart aylarında Cənubi Koreyada “BMW” and Mini" modeli avtomobillərinin satışı ötən ilin eyni dövrü ilə müqayisədə 51 faiz azalıb.