Avropa elektromobil məsələsində geri addım atacaqmı?

Yayda Avropa Parlamentinə keçirilmiş seçkilərdən sonra elektromobilə keçidin ləngiyəcəyi barədə söhbətlər səngimir.

Avtosfer.az xəbər verir ki, hətta Avropanın bir çox media qurumu parlamentə yeni gələn siyasi qüvvələrin avtomobil sənayesinin marağına cavab verdiyi barədə xəbərlıər tirajlayır. İndi bu xəbərlərin heç də yalan olmadığı üzə çıxır. 

Avropa Parlamentində ən böyük siyasi qüvvə olan Avropa Xalq Partiyası bu gün yeni təklif verib.  Partiya təklif edib ki, 2035-ci il qadağasına yenidən baxılsın, dizel mühərrikli avtomobillərə tətbiq edilən məhdudiyyətlər azaldılsın. 

Partiya fikrini belə əsaslandırıb ki, köhnə qitədə təzə avtomobil alışı azalıb. Digər tərəfdən, Çin Avropa bazarını ucuz və yaxşı komplektasiyalı maşınlarla doldurub. Yeni məhdudiyyətlər avropalılar üçün avtomobilin əlçatanlığını aşağı salır. 

Çin elektromobillərinə böyük məbləğdə vergi tətbiqi də Avropa Xalq Partiyasının təşəbbüsüdür. Partiya yaxın vaxtlarda avtomobil bazarı ilə bağlı rəsmi şəkildə müzakirələrin başlaması üçün təkliflər hazırlayır. 
Nəzərə alsaq ki, söhbət Avropanın ən böyük siyasi qüvvəsindən gedir, o zaman hazırlanan sənədin Avropa Parlamentindən keçəcəyi real görünür. Nəticəni görmək üçün ilin sonunadək gözləmək lazım gələcək.

Vüqar