Bu avtomobillərin idxalı ƏDV və rüsumlardan azad edilir

Raritet avtonəqliyyat vasitələrinin idxalına dair yeni güzəştlər tətbiq olunacaq. Avtosfer.az-ın məlumatına görə, bu məsələ Milli Məclisin bugünkü plenar iclasında müzakirə edilən Vergi Məcəlləsinə və “Gömrük tarifi haqqında” Qanuna dəyişiklikləri nəzərdə tutan qanun layihəsində əksini tapıb.

Hazırkı qanunvericiliyə əsasən, mühərriki, banı və şassisi orijinal vəziyyətdə olan və ya orijinal halına qaytarılmış, istehsal tarixindən 40 ildən artıq vaxt keçmiş nəqliyyat vasitələri raritet avtomobillər hesab olunur.

Təklif olunan dəyişikliklərə görə, belə avtomobillərin idxalı müvafiq dövlət orqanının təsdiqedici sənədi əsasında həyata keçiriləcək və bu zaman ƏDV, aksiz və gömrük rüsumlarından azad ediləcək. Şərtlərə əsasən, bir şəxs təqvim ili ərzində maksimum 1 raritet avtomobil idxal edə biləcək, ölkə üzrə isə bu rəqəm 10 ədəddən çox olmayacaq.

Qeyd olunub ki, sözügedən güzəştlər raritet avtomobillərin idxalı ilə məşğul olan şəxslərin xərclərinin azalmasına şərait yaradacaq. Qanun layihəsi müzakirələrdən sonra səsverməyə çıxarılaraq birinci oxunuşda qəbul edilib.

Könül Rauf