Bu dəfə məmurlar üçün qazla işləyən avtomobil alınacaq – TARİXİN TƏKRARI

Keyfiyyətli və yerli avtomobil istehsalına heç bir vəchlə nail ola bilməyən Rusiyada indi başqa çıxış yolu axtarılır. 

Avtosfer.az xəbər verir ki, Rusiyanın Maliyyə Nazirliyi dövlət satınalmaları haqqında qanuna yeni düzəliş təklif edib. Təklifə görə məmurlar üçün alınacaq avtomobillər qaz və ya elektrik mühərriki ilə təchiz olunmalıdır. 
Benzin və ya Dizel mühərrikli avtomobil alınması üçünsə xüsusi əsaslandırma tələb ediləcək. Dəyişiklik qəbul edilərsə, mayın 1-də qüvvəyə minəcək.
Rusiyalı ekspertlər bu ideyanı bəri başda səmərəsiz hesab edirlər. Çünki ölkədə yetərli qaz infrastrukturu və qaz mühərrikli avtomobil istehsalı mövcud deyil. 1982-ci ildə Sovet İttifaqı Kommunist Partiyasının qurultayında növbəti 10 il üçün planlardan biri də avtobusların və yük avtomobillərinin bütünlüklə dizelləşdirilməsi və ya qazlaşdırılması idi. Lakin 60-70-ci illərdə layihələndirilmiş benzin mühərrikli yük avtomobilləri 2000-ci illərin əvvəllərinədək istehsal edildi. Hətta bu gün Rusiya bazarı üçün V8 benzin mühərrikli PAZ avtobus istehsal edilir. “Jiquli”lər üçün Dizel mühərriki layihəsi də fiasko ilə nəticələnib.
Ən əsası isə, heç bir rus məmur Mercedes, Audi və ya Toyotadan əl çəkmək istəmir.

Vüqar