Bu ölkədə elektromobil velosipeddən ucuzdur - SƏBƏB  

Xəbərin başlığı heç bir manipulyasiya, və ya “oxucu ovlamaq” məqsədi güdmür. Bu, reallıqdır. 

Avtosfer.az xəbər verir ki, digər Avropa ölkələrində ən ucuz elektromobilin qiyməti 18 min avrodan yuxarı olduğu halda, İtaliyada bunu 3900 avroya əldə etmək mümkündür.

Məsələn, adi halda 17900 avro olan “Dacia Spring” 3900 avroya, 19 min avroluq “Leapmotor T03” isə 4900 avroya təklif edilir. Halbuki, ölkədə tanınmış brendlərin elektrikli velosipedləri 5000 avrodan bahadır. Bəs səbəb nədir?

Məsələ burasındadır ki, İtaliya hökuməti və istehsalçılar əhalini elektromobilə təşviq etmək üçün böyük subsidiya verir. Sadə dildə desək, 17900 avroluq elektromobilin 3900 avrosunu vətəndaş, qalan hissəsini isə dövlət ödəyir. Lakin bu güzəşt bütün italiyalılara şamil edilmir. 

Bunun üçün ailənin illik gəlirinin 30 min avrodan (62 000 AZN) az olması barədə bəyannamə təqdim olunmalı, ailədəki Avro-5 və daha aşağı ekoloji standartlı avtomobili utilizasiyaya verməlidir. 
Hökumət bu yolla avtoparkı yeniləmək, yaşı onu ötən maşınları yollardan yığışdırmaq istəyir.

Vüqar