"BYD" yenə rekord vurdu – Satışlar 18 faiz artdı

Çinin elektrik avtomobili istehsalçısı BYD-nin qlobal satışları avqust ayında 17,8% artaraq 440293 avtomobilə çatıb.

Avtosfer.az xəbər verir ki, bu, şirkətin satışlarının ardıcıl dördüncü ay artmasıdır.

Artımın əsas səbəblərindən biri xarici bazarlara ixracın kəskin yüksəlməsidir. Avqustda BYD-nin xaricə avtomobil tədarükü 134,5% artaraq 189466 ədədə çatıb.

Şirkətin beynəlxalq bazarlarda genişlənməsi Çində avtomobil satışlarının zəifləməsini kompensasiya edir. BYD xüsusilə Avropa, Cənub-Şərqi Asiya və Braziliyada satışlarını artırır.

Braziliya şirkətin ən böyük xarici bazarına çevrilib. BYD burada yerli istehsal ediləcək yeni plug-in hibrid avtomobilini də təqdim etməyə hazırlaşır.

Qeyd edək ki, BYD-nin xarici bazarlardakı güclənməsi şirkətin maliyyə göstəricilərinə də müsbət təsir edir. 2026-cı ilin ilk yarısında şirkətin beynəlxalq bazarlardan əldə etdiyi gəlir ilk dəfə Çindəki gəliri üstələyib./lent.az