"Lada"nın daha bir modelində sükan problemi üzə çıxdı - FOTO

Havaların soyuması ilə Lada Largus avtomobillərində yeni problem üzə çıxıb. 

Avtosfer.az xəbər verir ki, problemlə qazaxıstanlı sürücülər üzləşiblər. Onlar avtomobilin sükan gücləndiricisinin pis işləməsindən şikayətçidirlər. Soyuq havada sükan çətin dönür, hərəkət zamanı isə “ilişir”. 
Dilerlər problemi zavodun tövsiyəsi əsasında sistemə daha qatı yağ tökməklə həll etməyə çalışırlar. Hələlik, kütləvi geriçağırmaya lüzum görülmür. Problemə 10 min kilometrdən az yol qət etmiş avtomobillərdə rast gəlinir.

Qeyd edək ki, Avropadan gətirilmiş detallar qurtardıqdan sonra Avtovaz şirkəti 2022-ci ilin yayında Largusun istehsalını dayandırmışdı. İstehsalı 2024-cü ilin maytında, “dost ölkələrdən” komplektləşdiricilər gətirərək bərpa etmək mümkün olub.

Müstəqil ekspertlərin qənaətinə görə, yeni model VAZ avtomobillərində sükanın kilidlənməsi probleminə yerli proqram təminatı olan maşınlarda rast gəlinir. Bu da göstərir ki, “idxalın əvəzlənməsi” prosesi normal getmir.

Qeyd edək ki, sükan bloklanması məsələsinə görə Avtovaz avqustda kütləvi geriçağırma kampaniyası keçirib. Kampaniya çərçivəsində sükanın proqram təminatı dəyişdirilib. Kampaniya elektrikli sükan gücləndiricisi olan modellərə şamil edilib.

Vüqar