Mütəxəssislərdən yenilik: Yanacaq sərfiyyatını bu üsulla azalda bilərsiniz – ARAŞDIRMA - FOTO

Benzin və dizel qiymətlərinin durmadan artdığı bir vaxtda sürücülərin diqqətinə maraqlı, lakin effektiv bir tövsiyə təqdim edilib. Böyük Britaniyada fəaliyyət göstərən avtomobil platforması “ChooseMyCar.com”un ekspertləri yanacaq sərfiyyatını azaltmaq üçün sürpriz metodla çıxış ediblər: avtomobilin sərnişin oturacağına içi su ilə dolu bir qab qoymaq.

Avtosfer.az xəbər verir ki, bu üsul sürücünün qəfil sürətlənmə və ya kəskin əyləc vərdişlərini azaltmaqla yanacağa qənaət etməyə imkan yaradır. 

Mütəxəssislər bildirirlər ki, sərnişin oturacağına açıq su qabı qoymaq lazımsız sürətlənmə və qəfil əyləc hallarının qarşısını almaq üçün çox sadə, amma təsirli üsuldur:
“Bu, aqressiv sürücülüyə qarşı bir növ xəbərdarlıq sistemidir. Su daşırsa, demək ki, siz yanacağı da israf edirsiniz".

Tövsiyə olunan üsula görə, kiçik bir qabın içini təxminən 2-3 santimetr su ilə doldurub avtomobilin sərnişin oturacağına yerləşdirmək kifayətdir. Əgər sürücü qəfil hərəkət edərsə, suyun daşması onun davranışını tənzimləməsinə səbəb ola bilər.

Mütəxəssislər əlavə edirlər ki, sakit və sabit sürüş tərzi yalnız su qabını deyil, yanacaq sərfiyyatını da "yerində saxlamağa" kömək edir.

Eltac Zülfüqaroğlu