Orta Dəhliz yalnız yük daşımayacaq: Bakı üçün yeni imkanlar

Türkiyənin Çerkezköy–Kapıkule dəmir yolu xəttinin əsas hissəsinin tikintisinin başa çatdırılması Orta Dəhlizin Avropaya çıxışı baxımından mühüm addım kimi qiymətləndirilir. Xəttin oktyabrın 9-da rəsmi açılışının Türkiyənin Avropa dəmir yolu şəbəkəsi ilə bağlantısını daha da gücləndirəcəyi gözlənilir.

Avtosfer.az xəbər verir ki, nəqliyyat eksperti Rauf Ağamirzəyev bildirib ki, bu layihənin Azərbaycan üçün də xüsusi əhəmiyyəti var.

Ekspertin sözlərinə görə, Bakı–Tbilisi–Qars dəmir yolu xətti artıq Orta Dəhlizin əsas seqmentlərindən birinə çevrilib. Türkiyənin Avropa istiqamətində dəmir yolu infrastrukturunun genişləndirilməsi isə Çin–Mərkəzi Asiya–Azərbaycan–Gürcüstan–Türkiyə–Avropa marşrutu üzrə yükdaşımaların və tranzit imkanlarının artırılması üçün əlavə şərait yaradır.

 Orta Dəhlizin inkişafına yalnız yükdaşımaları prizmasından yanaşmaq düzgün olmaz. Avropa–Türkiyə–Qafqaz arasında müasir sərnişin dəmir yolu bağlantısının yaradılması da perspektivli istiqamətlərdən biri ola bilər.

Ekspert tarixi Şərq Ekspressinin Qafqaz və Xəzər sahili boyunca Bakı istiqamətində uzadılması ideyasını da diqqətəlayiq hesab edir. Onun sözlərinə görə, belə bir marşrutun yaradılması turizmin inkişafına, sərnişin mobilliyinin artırılmasına və regionlararası əlaqələrin gücləndirilməsinə ciddi töhfə verə bilər.

Rauf Ağamirzəyevin fikrincə, Orta Dəhliz gələcəkdə yalnız yük daşımalarının həyata keçirildiyi tranzit xətt deyil, həm də sərnişin və turizm dəhlizi kimi formalaşa bilər. Bu baxımdan Azərbaycan üçün Avropa ilə Qafqaz arasında yeni dəmir yolu bağlantılarının yaradılması həm nəqliyyat, həm də turizm baxımından əlavə imkanlar aça bilər.

Eltac Züflüqaroğlu