46 yaşlı kişi güllələnərək öldürüldü - Keçmiş qaynı tutuldu - VİDEO - YENİLƏNİB

Ötən gecə Salyan rayonunun Qardili kəndində baş verən qətl hadisəsinin təfərrüatı məlum olub.

Avtosfer.az APA TV-yə istinadən xəbər verir ki, ailə münaqişəsi zəminində kürəkənin öz qaynını ov tüfəngindən atəş açaraq qətlə yetirdiyi iddia olunur.

Qətl gecə saat 3 radələrində qeydə alınıb. Belə ki, rayonun Şəkərli kənd sakini, sərxoş vəziyyətdə olan 1966-cı il təvəllüdlü Natiq Sadıqovun ov tüfəngi ilə qaynı 1980-ci il təvəllüdlü Famil Lətifovu yaşadığı evin həyətində qətlə yetirdiyi bildirilir.

"Gecə idi yatmışdıq. Gördüm ki, bir dənə "Ford" gəlib qapının ağzına, yeznəmin maşını idi. Oğlum durdu ayağa, getdi açdı qapını. Kürəkənim maşını saxlayan kimi silahı götürdü əlinə. Uşaq ayaqyolunun qapısından içəri girmək istəyəndə onu vurdu. Yıxıldı qapının ağzına, öldü. Ürəyinin başından vurdu. Ayağına, qoluna vursa idi, heç olmasa salamat qalardı. Dörd uşağı qaldı. Yoldaşı da ölüb", - deyə mərhumun anası bildirib.

***09:09

İyulun 29-u gecə saatlarında Salyan rayonu ərazisində qətl hadisəsi baş verib.

Avtosfer.az xəbər verir ki, 1966-cı il təvəllüdlü Natiq Sadıqov sərxoş vəziyyətdə ov tüfəngi ilə keçmiş kürəkəni, 1980-ci il təvəllüdlü Famil Lətifovu yaşadığı evin həyətində baş vermiş münaqişə zəminində qətlə yetirib.

Polis əməkdaşlarının keçirdikləri tədbirlərlə N.Sadıqov saxlanılaraq istintaqa təhvil verilib. Ondan cinayətin aləti olan ov tüfəngi götürülüb.

Faktla bağlı araşdırma aparılır.