Avtomobilini qarajda saxlayanlara XƏBƏRDARLIQ; yana bilər

ABŞ-də avtomobillərin mühərriki söndürüldükdən sonra belə alışaraq yanğın törətməsi ilə bağlı geri çağırmaların sayı artıb. Bu il ərzində artıq 1,5 milyondan çox avtomobil bu risk səbəbindən servislərə geri çağırılıb.

Avtosfer.az xəbər verir ki, ABŞ Milli Yol Hərəkəti Təhlükəsizliyi Administrasiyasının (NHTSA) məlumatına görə, “Jeep Gladiator”, “Jeep Wrangler”, “Kia Telluride” və “BMW 530e xDrive” kimi bəzi modellərin sahiblərinə avtomobillərini binalardan və digər nəqliyyat vasitələrindən uzaqda, açıq ərazidə park etmək tövsiyə olunub.

Məlumata görə, yalnız 2026-cı ilin ilk 7 ayında bu tip 17 geri çağırma kampaniyası həyata keçirilib. 2024-cü ildə belə kampaniyaların sayı təxminən 10, 2025-ci ildə isə 19 olub.

İyunda “Stellantis” şirkəti hidravlik sükan nasosunun elektrik naqillərindəki problem səbəbindən ən azı 51 yanğın hadisəsi barədə məlumat daxil olduqdan sonra 1 milyon 76 min 999 ədəd “Jeep Gladiator” və “Jeep Wrangler” modelini geri çağırıb.

İyulda isə “Kia” ön oturacağın mühərrikinin həddindən artıq qızması səbəbindən 462 min 869 ədəd “Telluride” modelinə “çöldə park edin” xəbərdarlığı edib.

Mütəxəssislər bildirirlər ki, avtomobillərdə elektron sistemlərin sayının artması və kapotaltı hissədə yüksək temperaturun uzun müddət qalması mühərrik söndürüldükdən sonra belə yanğın riskini artırır.

ABŞ-də yaşayan Jeff Ebsch də bu təhlükə ilə üzləşib. Onun 2022-ci il istehsalı “Hyundai Santa Fe” avtomobili qarajda olarkən yanıb. Ebsch avtomobilinin geri çağırıldığından xəbərsiz olduğunu bildirib.

Təhlükəsizlik üzrə ekspertlər istehsalçıların təmir həyata keçirilməzdən əvvəl avtomobil sahiblərinə bu barədə xəbərdarlıq etməsini müsbət hal kimi qiymətləndirirlər.

Eltac Zülfüqaroğlu