Bakıda mənzildə YANĞIN - 8 nəfər təxliyə edildi - YENİLƏNİB

Bakının Nəsimi rayonunda yaşayış binasında baş verən yanğın zamanı bir nəfər ağır vəziyyətdə xəstəxanaya yerləşdirilib.

Avtosfer.az xəbər verir ki, bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.

Bildirilib ki, avqustun 25-də saat 11:30-da Respublika Təcili və Təxirəsalınmaz Tibbi Yardım Mərkəzinə Nəsimi rayonu, Cavadxan küçəsi, 21 ünvanından yanğın səbəbi ilə çağırış daxil olub:

"Hadisə yerinə dörd təcili tibbi yardım briqadası cəlb olunub. Tibb əməkdaşları tərəfindən üç qadına stresə qarşı reaksiya diaqnozu ilə yerində yardım göstərilib.

Bir qadın isə bədənin IV dərəcəli yanığı diaqnozu ilə Nərimanov Tibb Mərkəzinin nəzdindəki Yanıq Mərkəzinə hospitalizasiya olunub. Hazırda onun müalicəsi davam etdirilir, vəziyyəti ağır qiymətləndirilir".

***13:18

Fövqəladə Hallar Nazirliyinin “112" qaynar telefon xəttinə Bakı şəhəri, Nəsimi rayonu, Cavadxan küçəsində mənzildə yanğın baş verməsi barədə məlumat daxil olub.

Bu barədə Avtosfer.az-a FHN-dən məlumat verilib.

Bildirilib ki, dərhal əraziyə FHN-in Dövlət Yanğından Mühafizə Xidməti və Bakı Regional Mərkəzinin qüvvələri cəlb olunub.

Yanğınsöndürənlərin çevik müdaxiləsi sayəsində beşmərtəbəli yaşayış binasının 4-cü mərtəbəsində yerləşən mənzildə baş vermiş yanğın genişlənməsinə, o cümlədən digər mənzillərə yayılmasına imkan verilmədən qısa müddətdə söndürülüb.

Təhlükəsizlik tədbirləri çərçivəsində 2-si azyaşlı olmaqla 8 nəfər bina sakini təxliyə edilib.