Bakıda qadın küçədə yumruqlandı

Bakının Nərimanov rayonunda 26 yaşlı oğlan münasibətdə olduğu qadına xəsarət yetirib. Avtosfer.az “Demokrat.az”a istinadən xəbər verir ki, hadisə bu ilin yanvarın 26-da rayonun Azadlıq prospekti 155 ünvanının qarşısında baş verib. İmişli rayon sakini, 2000-ci il təvəllüdlü Sahib həmin gün saat 20:30-da küçədə olduqları zaman qısqanclıq zəminində qeyri-rəsmi münasibətdə olduğu Fatimə (adlar şərtidir – red.) ilə mübahisə edib. Mübahisə zamanı o, qəsdən yumruğu ilə qadının sifət nahiyəsinə vuraraq ona müxtəlif dərəcəli xəsarətlər yetirib. 

Faktla bağlı Sahibin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib. İş üzrə ifadə verən Sahib əməli törətməkdə özünü təqsirli bilib. O, zərərçəkmiş şəxs ilə barışdığını və ona vurduğu ziyanı tam olaraq ödədiyini bildirib. Nərimanov Rayon Məhkəməsinin qərarı ilə təqsirləndirilən şəxsin barəsində olan cinayət təqibinə xitam verilib. O, cinayət məsuliyyətindən azad edilib.