Bakıda sürücüdən qayda pozan piyadaya sərt irad: “Uşağı vursaydım nə olacaqdı?” - VİDEO

Paytaxtın Nizami rayonu, Mehdi Abbasov küçəsində yol hərəkəti qaydalarını pozan piyada kameraya düşüb.

Avtosfer.az-ın məlumatına görə, hadisə bir neçə gün əvvəl səhər saatlarında qeydə alınıb. Görüntülərdən məlum olur ki, azyaşlı övladı ilə birlikdə hərəkət edən piyada, işıqforun qadağanedici siqnalına məhəl qoymadan nizamlanan piyada keçidindən yolu keçməyə çalışıb. Bu zaman həmin şəxs yaxınlaşmaqda olan motosiklet üçün qəza şəraiti yaradıb.

Kadrlarda motosiklet sürücüsünün piyadaya etiraz etdiyi də əks olunub. Moto sürücü “Uşaqla yolu keçirsən, görmürsən qırmızı işıqdır? Uşağı vursaydım nə olacaqdı?” deyərək narazılığını bildirib. Piyada isə cavabında işıqfora diqqət etdiyini, lakin sağ zolaqda avtomobilin dayandığını görərək yolu keçdiyini söyləyib.

Qeyd edək ki, qanunvericiliyə əsasən, piyadalar nizamlanan keçidlərdə yalnız işıqforun icazəverici siqnalı zamanı hərəkət etməlidirlər. Xüsusilə azyaşlılarla birlikdə yolu keçərkən qaydalara əməl olunmaması həm piyadanın, həm də digər hərəkət iştirakçılarının həyatı üçün ciddi təhlükə yarada bilər.

Nərmin