“BakuBus” avtobusu niyə tüstüləyib? - RƏSMİ AÇIQLAMA - VİDEO - YENİLƏNİB

Avtobusda yaranan tüstülənmə ilə əlaqədar "BakuBus"dan Avtosfer.az-a bildirildi ki, bu gün, saat 08:33 radələrində “BakuBus” MMC-nin istismarında olan 3 nömrəli müntəzəm marşrut xətti üzrə hərəkət edən, 99-JZ-192 dövlət qeydiyyat nişanlı avtobusun mühərrikinin turbokompressor sistemində texniki nasazlıq baş verib:

"Nəqliyyat vasitəsini idarə edən sürücü Əvəz Əliyev yaranmış nasazlıq barədə dərhal “BakuBus” Monitorinq Mərkəzinə məlumat vermiş, hadisənin baş verdiyi əraziyə dərhal Texniki Xidmət Servisi cəlb edilib. Hazırda nasazlığın aradan qaldırılması ilə bağlı texniki xidmət əməkdaşları tərəfindən müvafiq işlər yerinə yetirilir.

Sərnişinlərin daşınmasında fasilə yaranmaması üçün hadisə yerinə alternativ nəqliyyat vasitəsi yönləndirilmiş və sərnişinlərin daşınması operativ şəkildə təmin olunub.

Yaranmış texniki nasazlıqla bağlı bütün sərnişinlərdən üzr istəyirik".

***

16:25

***

Paytaxtın Yasamal rayonunda “BakuBus" MMC-yə məxsus sərnişin avtobusundan tüstü çıxdığı müşahidə olunub.

Avtosfer.az xəbər verir ki, hadisə şahidlərinin sözlərinə görə, avtobusun arxa hissəsindən qalxan tüstü ətrafda narahatlıq yaradıb.

Abdulla Şaiq küçəsində tüstülənmə artdığı üçün sürücü dərhal avtobusu saxlayaraq sərnişinlərin təhlükəsiz şəkildə düşməsini təmin edib. Avtobusda alovlanma qeydə alınmasa da tüstülənmənin texniki nasazlıq səbəbindən yarandığı ehtimal olunur.

Hadisənin detallarının araşdırılması istiqamətində işlər davam etdirilir.

Eltac Zülfüqaroğlu